Шілде айынан Қазақстан мен Германия арасындағы авиа рейстер артады
2022 жылғы 12 мамыр 14:05

Шілде айынан Қазақстан мен Германия арасындағы авиа рейстер артады

НҰР-СҰЛТАН. ҚазАқпарат - Қазақстан мен Германия арасында авиарейстер саны артады. Бұл туралы ҚР Индустрия және инфрақұрылымдық даму министрлігі Азаматтық авиация комитетінен мәлім етті, деп хабарлайды ҚазАқпарат.

Эпидемиологиялық жағдайдың жақсаруы мен карантиндік шектеулердің жеңілдетілуіне байланысты ҚР ИИДМ Азаматтық авиация комитеті халықаралық әуе қатынасын қалпына келтіру және әуе рейстерін ұлғайту бойынша жұмысты қолға алды.

Осылайша, шілде айынан бастап Қазақстан мен Германия арасында аптасына 15 рейс орындалатын болады, оның ішінде «Орал – Франкфурт» бағыты бойынша да рейстер бар.

Атап айтқанда, биылғы 15 мамырдан бастап «Эйр Астана» әуекомпаниясы А321LR үлгісіндегі әуе кемесінде «Нұр-Сұлтан – Франкфурт» бағыты бойынша рейстерді аптасына 5-тен 6 рейске дейін, сондай-ақ 1 маусымнан бастап 6-дан 7 рейске дейін арттыруды жоспарлап отыр.

Бұдан басқа, 2 маусымнан бастап «Lufthansa» авиакомпаниясы А330/А340 әуе кемесінде «Франкфурт – Нұр-Сұлтан/Алматы» бағытындағы тұрақты рейстер санын аптасына 4-тен 5-ке дейін, 4 шілдеден аптасына 7 рейске дейін ұлғайтпақ.

«Барлық рейс санитарлық-эпидемиологиялық талаптарды қатаң сақтай отырып және әуекомпания сайтында жарияланған кестеге сәйкес жүзеге асырылатын болады. Әуе рейстерінің ұлғаюы екі ел арасындағы өзара ынтымақтастықтың одан әрі нығаюына, сондай-ақ туризмнің дамуына ықпал етеді деп күтілуде», - делінген Азаматтық авиация комитетінің мәліметінде.


Jańalyqtar

MURAǴAT