Шетелдегі бітімгерлік миссияға жас сарбаздар алына ма

НҰР-СҰЛТАН. ҚазАқпарат – ҚР Қарулы Күштері Бас штабы Ұйымдастыру-жұмылдыру жұмыстары департаментінің бастығы Сәкен Жүсіпов бітімгерлік миссиясына қатысатын қызметкердің әскери салада кем дегенде 3 жылдық тәжірибесі болуы керектігін мәлім етті, деп хабарлайды ҚазАқпарат тілшісі.

«Қазақстан Республикасының әскери қызметшілерінің бітімгерлік бөлімшелерге алынуы ерікті түрде жүргізіледі. Ондай әскери қызметші Қорғаныс министрлігінің тиісті дайындығынан өтуі керек. Бітімгерлік миссиясына тек келісімшарт бойынша әскерде жүргендер алынады. Яғни оның әскери салада жүргеніне кем дегенде 3 жыл болуы қажет. Осылайша, мерзімді әскери қызметке шақырылған сарбаздар бітімгерлік миссиясына қатыспайды», - деді Орталық коммуникациялар қызметінде өткен баспасөз мәслихатында Сәкен Жүсіпов.

Айта кетсек, Қазақстанда биыл күзде 17 мыңнан астам азамат әскерге шақырылады.

Еске сала кетсек, өткен айда Ливан Республикасындағы сегіз айлық қызметтен кейін 3-інші бітімгерлік рота елге оралған болатын.