Шетелде тұратын 300-ге жуық қазақ баласы демалу үшін Бурабайға келді
«Туған жер – алтын бесік» тақырыбымен ашылған халықаралық балалар құрылтайына Ресей, Қытай, Өзбекстан, Қырғызстан сияқты көрші мемлекеттердегі қазақ диаспораларынан барлығы 288 бала келген. Демалушылардың дені - өз ортасында оқу озаты және түрлі дарын иесі.
Ауысымның ашылуында сөз сөйлеген Ақпарат және қоғамдық даму вице-министрі Марат Әзілханов шетелдегі қазақ балаларының Қазақстанға келіп, демалуына және ана тілін үйренуіне барлық жағдай жасалып жатқанын атап өтті.
«Биыл осымен оныншы жыл қатарынан «Балдәурен» республикалық оқу-сауықтыру орталығында шетелдегі қазақ диаспораларының балалары келіп демалуда. Бұл жолы 300-ге жуық шетелдегі қазақ балаларын қабылдап отырмыз. Олардың демалуына барлық жағдай жасалған. «Балдәуреннің» бір ауысымда 600 баланы қабылдауға мүмкіндігі бар. Сондықтан, келер жылы сырттан келетін қазақ балаларының санын одан әрі арттыру жоспарлап отырмыз», - деп атап өтті вице-министр.
Дүниежүзі қазақтары қауымдастығы өкілдерінің айтуынша, бұл жұмыс ҚР Тұңғыш Президенті Нұрсұлтан Назарбаевтың бастамасымен шетелдегі қазақ диспорларын қолдау мақсатында қолға алынып, ондағы жеткіншектерге ана тілін үйретуді көздейді.
«Еліміздің Тұңғыш Президенті - Елбасы Нұрсұлтан Назарбаев Дүниежүзі қазақтарының V құрылтайында шетелдегі ағайынды Атамекенді ұмытпай, оны әрдайым құрмет тұтуға шақыра отырып, осы жолда шетелдегі қандастарымызға қолдау көрсетудің тетіктерін анықтауды тапсырған болатын. Осы бағыттағы шаралар аясында Дүниежүзі қазақтарының қауымдастығы мен «Отандастар» қоры ҚР Білім және ғылым министрлігінің қолдауымен шет елдерде тұратын қазақ диаспорасы өкілдерінің жас жеткіншектеріне арнап арнайы балалар орталығын ұйымдастыруда», деп атап өтті маусымының ашылуында Дүниежүзі қазақтары қауымдастығы төрағасының орынбасары Арғын Оспанов.
Сонымен қатар, шарада «Отандастар» қорының вице-президенті Мағауия Сарбасов пен Ресей Федерациясының Қазақстандағы елшілік кеңесшісі Кирилл Тиллябев халықаралық балалар құрылтайының тиімді тұстарына тоқталды.
«Ресей Федерациясында ресми есеп бойынша бір жарым миллионға жуық қазақ жергілікті жұртпен тату-тәтті тіршілік етуде. Олардың туып-өскен жері - Ресей топырағы болғанымен, тарихи Отаны – Қазақстан», - деді Кирилл Геннадьевич. – Менің ойымша бәлкім одан да көп болуы мүмкін. Аумалы-төкпелі талай заман өтті ғой. Біз ежелден достық қарым-қатынастағы елміз. Осы балалар мемлекеттеріміздің арасындағы шынайы достықты одан да бекіте түсетін ұрпақ».
«Балдәуренде» тынығуға келген қандастарымыздың балалары өздерінің алғашқы әсері туралы айтты. Соның бірі – Ресейдің Иванов облысынан келген мектеп оқушысы Әмина Жақсылықова «Балдәурен» өзіне ұнайтынын және осында үшінші рет келіп отырғанын атап өтті.
«Мен Ресейден келдім. Біз Иванов облысының Иванов қаласында тұрамыз. «Балдәуренге» үшінші рет келіп отырмын. Маған «Балдәурен» қатты ұнайды. Осы жерде әртүрлі елдерден келген қазақ балаларымен таныстым. Егер мүмкіндік болып жатса, осы жерге тағы да келер едім», - дейді Әмина Жақсылықова.
Ал, Моңғолия елінен келген 9-сынып оқушысы Айдана Досымбек «Балдәурен» ана тілін жетілдіруге көмектесетінін айтуда.
«Мен Моңғолия астанасы - Ұлан-Батырда тұрамын. Онда қазақ мектептері жоқ. Мен моңғол тілінде дәріс беретін мектепте оқимын. Бірақ Моңғолияда біздер, қазақтар өзара ана тілімізде сөйлесеміз. Қазақстанда біздің көптеген туыстарымыз тұрады, олардың көпшілігін танимын. «Балдәуренде» алғаш рет болып тұрмын, маған қатты ұнады, тағы да келгім келеді. Барлығы 24 бала келдік. Менің осы лагерьге баратынымды естіген сыныптастарымның басым көпшілігінің келгілері келді. Бұл менің ойымша, одан арғы оқуыма әрі тіл білуімді жетілдіруге көмектеседі», - деді Айдана Досымбек.
Екі апталық жазғы демалыс маусымында шетелден келген қазақ балаларының белсенді демалуына, әртүрлі мәдени және спорт шараларына қатысуына, ең бастысы - ана тілін меңгеруіне мүмкіндіктер ұсынылады.
