«Шардара-Арыс» автожолы пайдалануға берілді
Түркістан қаласы облыс орталығы мәртебесін алғаннан бастап өңірдің жолаушылар көлігі және автомобиль жолдары басқармасының тапсырысымен жалпы ұзындығы 252,6 шақырымды құрайтын Жетісай-Шардара-Арыс-Ордабасы аудандары арқылы өтетін жол кезең-кезеңімен жөндеуден өткізілуде.
2019-2021 жылдары жолдың 70-111 шақырым (Қазақстан-Достық елді мекендері) аралығына (41 шақырым) мердігер мекеме «Дорстрой» ЖШС-і тарапынан күрделі жөндеу жұмыстары іске асырылып, ағымдағы жылдың қараша айында пайдалануға берілді. Жөндеу жұмыстары барысында 41 шақырым жолдың негізі және асфальт жабыны жаңартылды.
Одан бөлек, жол бойындағы 7 көпір күрделі жөндеуден өткізіліп, жаңадан су өткізгіш құбырлар орнатылды. Сонымен қатар, жаяу жүргіншілердің қауіпсіздігін қамтамасыз ету мақсатында жасанды жол кедергілері орнатылды. Жалпы 450 дана жаңа жол белгілері қойылды. Сондай-ақ, елді мекендердің ішіне аяқжол салынып, диодты жарықтандыру шамдары және заманауи үлгідегі аялдамалар орнатылды.