Шамалған стансасында жол өтпесі эстакада түрінде салынады

None
None
НҰР-СҰЛТАН. ҚазАқпарат – Алматы облысының Шамалған теміржол станса жол өтпесінің құрылысы биыл қарқын алмақ. Бүгінгі таңда нысанда алдағы құрылыс маусымына дайындық жұмыстары жүргізілуде, деп хабарлайды ҚазАқпарат.

ҚР Индустрия және инфрақұрылымдық даму министрлігінің Автомобиль жолдары комитеті Шамалған стансасындағы жол өтпесінің құрылысын жүргізу тақырыбына арналған ғылыми-техникалық кеңес өткізді. Шара аясында көліктік жол айырығын бірінші техникалық санатқа сәйкес жобалау жөнінде шешім қабылданған болатын. Мамандар жол өтпесін ұзындығы 340 метрді құрайтын эстакада түрінде салу нұсқасын анықтады.

«Құрылыс жұмыстары үшін Шамалған мен Екпінді елді мекендерінің арасындағы жол учаскесі таңдап алынды. Жол айырығы қолданыстағы теміржол өтпесінен 250 метрге алшақтау орналасады. Бұл негізгі тасжолдарға жету жолын 0,7 шақырымға қысқартуға, сондай-ақ транзитті көлік ағынын елдімекеннен тыс жерге шығаруға мүмкіндік береді», - делінген ҚР ИИДМ баспасөз қызметінің мәліметінде.

Белгілі болғандай, 2019 жылдың қарашасында «Сәулет-SKB» ЖШС жобалық-сметалық құжаттаманы әзірлеу шараларына кіріскен еді. Аталмыш шаралар осы жылдың наурызында аяқталады деп жоспарланып отыр. Желтоқсан айында «Тодини Конструциони Дженерали С.п.А.» АҚ/ «Integra Construction KZ» ЖШС Консорциумымен құрылыс-монтаждау жұмыстарын атқару жөніндегі келісімшартқа қол қойылды. Нысан 2021 жылдың тамызында пайдалануға беріледі деп жоспарлануда.

Бұдан бөлек, «ДСУ-13» ЖШС облыстық маңызы бар «Алматы-1 – Шамалған – Ұзынағаш» автожолында Шамалған станциясындағы теміржол өтпесі арқылы өтетін жерүсті жаяу жүргіншілер өтпесін салып жатыр. Бұл мақсаттарға жергілікті бюджеттен 330 млн теңге бөлінген.

Еске сала кетейік, ҚР Үкіметінің қаулысымен Шамалған станциясындағы теміржол өтпесі ерекше реттеуді талап ететін құрылыс нысандарының қатарына жатқызылған.

Естеріңізге сала кетейік, өткен жылы 15 қыркүйек күні Шамалған стансасында пойыз рельсте тұрып қалған автобусты келіп соққан еді.

Апаттан автобус жүргізушісі мерт болып, тағы 3 адам зардап шекті.

Кейін Шамалған стансасында жүргіншілер көпірінің құрылысы басталды.


Соңғы жаңалықтар