Шалғай ауылдарда тұратын 7 мыңнан астам адам медпойызда тексеруден өтті
«Медициналық пойыз» Алматы, Шығыс Қазақстан және Павлодар облыстарының шет аймақта орналасқан бекеттерінде болды. Қазіргі уақытта ол Ақмола өңіріне келді.
Пойыз іске қосылған күннен бастап 7 420 адам, оның ішінде 1 465 бала қабылдауда болды, сондай-ақ дәрігерлерге келушілердің саны 20 000-нан асады, 623 кіші хирургиялық ота жасалды, 283 ФГДС процедурасы, 2 416 УДЗ жасалды, және флюрографиядан 1 324 адам өтті.
«Өткен жылы 124 шалғай бекетте тұратын 40 000-нан астам тұрғын тексерілді. Биыл біз баратын облыстардың санын көбейттік. Егер бір жыл бұрын пойыз 9 облыстың ғана тұрғындарын тексерсе, биылғы маусымда дәрігерлер бригадасы 21 желтоқсанға дейін жолда болып, Қазақстанның 14 облысының 195 бекетін қамтиды. 60 000-нан астам адамды қамту жоспарланған», - деді «Samruk-Kazyna Trust» Әлеуметтік жобаларды дамыту қоры бас директорының орынбасары Әсел Шілдебаева.
Атап өтейік, биыл медициналық пойыз Алматы қаласынан бастау алды және Қазақстанның барлық облыстарында болады. 17 маусым мен 7 шілде аралығында медициналық пойыз Солтүстік Қазақстан және Ақмола облыстарындағы 24 бекетті аралайды.
Жоба аясында еліміздің медициналық қызмет қолжетімсіз шалғай аудандарының тұрғындарына тегін медикалық-санитарлық, консультативтік-диагностикалық көмек көрсетіледі. Медициналық бригадалардың құрамында терапевт, стоматолог, окулист, маммолог, невропатолог, кардиолог сияқты басқа да мамандар бар.
Естеріңізге сала кетейік, 29 сәуір күні Қазақстанда «Медициналық пойыз» жобасы басталған болатын. Жобаны «Самұрық-Қазына» АҚ компаниялар тобының атынан «Samruk-Kazyna Trust» Әлеуметтік жобаларды дамыту қоры «Қазақстан Темір Жолы» ҰҚ» АҚ жанындағы Әлеуметтік жобалар қорымен бірлесіп, сондай-ақ ҚР Денсаулық сақтау министрлігінің қолдауымен жүзеге асырады.
Пойыз кестесін мына сайттардан көруге болады: medpoezd.kz және sk-trust.kz/ru.
