Шахмат Олимпиадасында еліміздің ерлер құрамасы жеңіске жетті

НҰР-СҰЛТАН. ҚазАқпарат - Үндістанның Ченнай қаласында өтіп жатқан шахмат Олимпиадасында еліміздің ерлер құрамасы жетінші жеңісіне қол жеткізді, деп хабарлайды ҚазАқпарат тілшісі.

Қазақстандық шахматшылар Хорватияны 3:1 есебімен сүріндірді. Құрама сапынан Әлішер Сүлейменов және Арыстанбек Оразаев жеңіске жетсе, Ринат Жұмабаев пен Қазыбек Нөгербек тең нәтижеге қанағат білдірді.

Осылайша ел құрамасы Олимпиадада жеті мәрте жеңіске қол жеткізіп, үш мәрте қарсыластарына есе жіберді.

Ерлер құрамасы бұған дейін Ливан мен Латвияны 4:0, Қытай Тайбейін 3:1, Марокко, Чехия, Испанияны 2,5:1,5 есебімен жеңіп, Тәжікстан, Әзербайжанға 1,5:2,5, Сербияға 1:3 есебімен есе жіберген-ді.

Нәтижесінде Олимпиада рейтингінде 25-орыннан 20-орынға көтерілді. Алғашқы екі орында Өзбекстан және Армения құрамалары келеді.

Еске салсақ, бүгін еліміздің қыздар құрамасы Үндістаннан жеңіліп қалғанын жазған едік.