Шахмат федерациясының вице-президенті Бибісара Асаубаеваның мәлімдемесіне жауап берді
«Дау күтпеген жерден шықты. Бұған дейін мен ол мәлімдеменің шындыққа жанаспайтынын айтқан болатынмын. Ең бастысы, біз Бибісараны, оның зор таланты мен әлеуетін жоғары бағалаймыз. Жанжал неден туды? «Қыздарды президентке ақша сұрау үшін апарған» деген мәлімдеме тараған. Бірақ біз сіздерге даму тұжырымдамасын көрсеттік, бұл - Мемлекет басшысына ұсынған құжат. Онда ақша туралы ештеңе жоқ, ешқандай сома айтылмаған. Біз шахматты дамытудың тұжырымдамасы мен тәсілдері туралы айттық», - деді Дәрмен Сәдуақасов журналистермен кездесуде.
Оның айтуынша, шахмат федерациясы катализатор, ол мемлекеттік бюджетті басқармайды.
«Егер қаржы бөлінетін болса, ол министрлік, әкімдік арқылы шахмат секциялары мен үйірмелер ашуға, спортшыларды қаржыландыруға жұмсалады. Федерация шахматты бұқаралық спорт, жоғары жетістіктер спорты тұрғысынан қалай дамыту керектігі туралы кәсіби пікір білдіреді», - деді спикер.
Сонымен қатар, ол Бибісараның неліктен мұндай мәлімдеме жасағанына да жауап берді.
«Біз Бибісараның анасы тарапынан қызғаныш болуы мүмкін деп ойлаймыз. Бұл жазбаны Бибісараның өзі емес, анасы жазған болуы мүмкін. Бұл - біздің ұстанымымыз. Мүмкін олай емес шығар», - деді федерация вице-президенті.
Сонымен қатар, Дәрмен Сәдуақасов федерацияда спортшыларды қаржыландыруда теңгерімсіздік бар екенін айтты. Оның пікірінше, бұл дұрыс емес.
Бұған дейін Бибісара Асаубаева өзінің Instagram парақшасында шахмат федерациясы танымал спортшыларды Президент әкімшілігінен үш миллиард теңге сұрату үшін пайдаланды деп жазған болатын.