Шағым түскен жоқ: Құзырлы орган Ақтау дүкенін жайлаған тарақандарға пікір білдірді

АҚТАУ. ҚазАқпарат – Ақтау дүкенінің нан сөресін жайлаған тарақандар туралы ешқандай шағым түскен жоқ. Мұны ҚазАқпарат тілшісінің сауалына жауап берген Ақтау қалалық санитарлық-эпидемиологиялық бақылау басқармасының басшысы Асима Жарылғасова мәлім етті.

«Аталған видеодадағы жағдай бойынша қала тұрғындары тарапынан ешқандай шағым түскен жоқ. Жалпы сауда-саттық нысандары маңызы елеусіз обьектілер қатарына жатқызылады. Сол себептен олар хабарлама беру арқылы жұмысын іске асырады. Санитарлық-эпидемиологиялық тексеру маңызы елеусіз нысандарға жүргізілмейді. Алайда, адам денсаулығына қауіп төнген жағдайда шағын кәсіпкерлікке жарияланған мораторийді ескере отырып, жоспардан тыс санитарлық-эпидемиологиялық тексеру жұмыстары жургізіледі. Мораторий кәсіпкерді санитарлық талаптарды орындаудан босатпайды. Сауда-саттық нысандары арнайы мамандырылған мекемемен келісім шартқа отырып, айына 1 рет және қажетінше дезинфекция жұмыстарын жүргізуі қажет», - деп жауап берді Асима Жарылғасова ҚазАқпарат тілшісінің сауалына.

Жергілікті құзырлы орган мәліметінше, санитарлық-эпидемиологиялық тәртіп бұзылғаны туралы арызды кез келген адам eOtinish порталы арқылы жолдай алады.

Еске сала кетейік, бұған дейін Ақтау дүкенінде нан өнімдерінің арасында жүрген тарақандардың видеосы тарағанын жазып едік.