Серікқали Брекешев: 2025 жылдан кейін Астанада көмір жағуға тыйым салу керек
Кездесу барысында қаланың экобелсенділері қыста жер үй массивтерінен келетін түтін қаланың ауасын ластайтынын айтып, осы мәселені біржола шешу қажеттігін жеткізді.
Экологиялық реттеу және бақылау комитетінің төрағасы Зулфухар Жолдасов бұл мәселе қалаға толығымен газ тартылған кезде шешілуі керектігін атап өтті.
Аталған шаруа 2025 жылға дейін аяқталады деген есеп бар екенін айтқан комитет басшысы, осы кезеңнен кейін тұрғындарға қатты отын жағуға тыйым салу көзделіп отырғанын да жеткізді.
Бұл мәліметті министр де қостады.
«2025 жылға дейін осы қала толығымен газдандырылса игі. Яғни, осы аймаққа газ келіп тұр ма, тек газ пайдалану керек деген ұсынысымыз бар. Көмірге тыйым салып, оны кәдімгідей нақты «пайдалануға болмайды» деген ұсынысты пысықтап жатырмыз. Әрі қарай көреміз енді. Бірінші газдандыру шаруасын бітіріп алайық, одан кейін әрі қарай нақты бір шаралар қолданармыз», - деді Серікқали Брекешев.