Серік Бердімұратұлы Моңғолияның жоғары дәрежелі «Піл» атағын жеңіп алды

БАЯН-ӨЛГИЙ. ҚазАқпарат – Моңғолияның Ұлттық мерекесіне арналған күрес сайысында қандасымыз Серік Бердімұратұлы мемлекеттік піл дәрежелі палуан атағына ие болды. Бұл туралы ҚазАқпарат kaznews.mn сайтына сілтеме жасап хабарлайды.

Серік Бердімұратұлы күрестің 7 кезеңінде мемлекеттік заан Доржийн Анарды жығып, мемлекеттік «заан» яғни мемлекеттік Піл дәрежелі палуан атағына ие болды.

Серік Бердімұратұлы жасыл алаңда Э.Сумьяабат (6 кезең), Ц.Төмөрцоож (5 кезең), П.Даваадорж (4 кезең), Ш.Чинтулга (3 кезең), Б.Өлзийсайхан (2 кезең), Э.Дашзэвэг (1 кезең) қатарлы пауландарды айқын басымдықпен ұтты.

8 кезеңде мемлекеттік аварга (алып чемпион) дәрежелі палуан Намсрайжав Батсуурьдан ұтылып қалды.

Серік Бердімұратұлы 1994 жылы туған. Салмағы 110 келі. 2011 жылы аймақтық піл дәрежелі палуан, 2013 жылы аймақтық арыстан дәрежелі палуан, 2017 жылы мемлекеттік лашын дәрежелі палуан атанған болатын.

Айта кетсек, Моңғолияның Ұлттық мерекесі Ғұн империясының 2230, 2231 жылдығы, Моңғол империясы орнауының 815, 816 жылдығы, Ұлт азаттық қозғалысының 110, 111 жылдығы және Халық революциясының 99 жылдығына орай ұйымдастырылды.