Сенатта мәдениетаралық диалог жөніндегі зерттеулер жүргізуге жәрдемдесетін құжат қабылданды
Заң жобаның мақсаты - Алматы қаласында «Мәдениеттерді жақындастыру орталығы» мемлекеттік музейі» республикалық мемлекеттік қазыналық кәсіпорнының негізінде ЮНЕСКО-ның қамқорлығымен мәдениеттерді жақындастыру халықаралық орталығының (2-санат) жұмыс істеуін қамтамасыз ету.
«2015 жылы Елбасы Нұрсұлтан Назарбаев ЮНЕСКО-да Қазақстан бастамашылығымен және БҰҰ Бас Ассамблеясы жариялаған Мәдениеттерді жақындастырудың халықаралық онжылдығын (2013-2022 жж.) өткізу аясында ЮНЕСКО-мен бірлесіп мәдениеттерді жақындастырудың халықаралық институтын құру туралы ұсыныспен сөз сөйлеген болатын. Аталған идеяны іске асыру үшін жоспарлы жұмыстар жүргізілді. Осылайша, ҚР Үкіметінің 2015 жылғы желтоқсандағы қаулысымен «Мәдениеттерді жақындастыру орталығы» мемлекеттік музейі құрылды», - деді ҚР Мәдениет және спорт министрі Ақтоты Райымқұлова.
2017 жылғы қарашада ЮНЕСКО-ның Бас конференциясының 39-шы сессиясы отырысында орталыққа ЮНЕСКО-ның 2-ші санаты мәртебесі берілді. 2019 жылғы маусымда ҚР Үкіметі мен ЮНЕСКО арасында ЮНЕСКО-ның 2-санаттағы мекемесі – Мәдениеттерді жақындастырудың халықаралық орталығын ұйымдастыру туралы келісімге қол қойылды.
«Келісімді ратификациялау мәселесі осы жүргізілген жұмыстардың қисынды аяқталуы болып саналады. Осы тұрғыдан, жоғарыда баяндалғанды ескере отырып, берілген шартты ратификациялау елдің халықаралық деңгейде орнықты дамуына ықпал ететін болады. Орталық этностардың, мәдениеттер мен діндердің шығу тегі саласындағы іргелі және қолданбалы зерттеулер жүргізуге, мәдениетаралық қоғамдардың және олардың бірегейлігінің қалыптасуына, бейбітшілік пен тұрақты даму мүддесінде мәдениетаралық диалог құндылықтарын таратуға бағытталған халықаралық ынтымақтастыққа арналған бірегей платформа болады. Мәдениеттерді жақындастыру орталығына ЮНЕСКО-ның 2-санаты мәртебесін беру еліміздің ұлттық мүдделеріне жауап береді, Қазақстан Республикасы үшін саяси және әлеуметтік пайдалы, ЮНЕСКО жүйесінде біздің бастамаларымызды іске асыруды тиімді ілгерілетуге ықпал етеді», - деді министр.