Сенат төрағасы депутаттарға Президент тапсырмаларының орындалуына мониторинг жүргізуді тапсырды
«Нақтыланған бюджеттің жаңа параметрлері Президенттің Жарлығымен бекітіліп, жарияланды. Жалпы, азаматтар мен бизнесті қолдауға бағытталған қаражаттың көлемі 6 триллионға жуық теңгені құрайды. Бұл қаржы дағдарысқа қарсы шараларды іске асыруға бағытталған, экономиканы, шағын және орта бизнесті, ауыл шаруашылығы мен азаматтарды осы күрделі жағдайда қолдауды көздейді. Біздің міндетіміз – дағдарысқа қарсы шараларға бөлінген қаражаттың жұмсалуын бақылау жасау, осы шаралар туралы халықты хабардар ету», -деді Д. Назарбаева Сенаттың жалпы отырысында.
«Сондықтан Сенат комитеттеріне өз бағыттары бойынша, өңірлерден сайланған депутаттарға – өз өңірлері бойынша, Президент тапсырмаларының орындалуына тұрақты мониторинг жүргізуді, Үкіметтің дағдарысқа қарсы шараларының іске асырылуын бақылауға алуды тапсырамын», - деді Сенат төрағасы.
Бұдан бұрын хабарланғандай, жалпы отырыс барысында Дариға Назарбаева Агроөнеркәсіп кешенін дамыту бағдарламасын қайта қарау керектігін айтты.