Сенат сайлауы: депутаттық корпус сапалық тұрғыдан өзгереді - Мәулен Әшімбаев

2022 жылғы 26 қараша, 17:24
Сенат сайлауы: депутаттық корпус сапалық тұрғыдан өзгереді - Мәулен Әшімбаев

АСТАНА. ҚазАқпарат – Сенат сайлауы депутаттық корпустың сапалық тұрғыдан өзгеріп, өз жұмысын жаңа міндеттер аясында лайықты жалғастыруына мүмкіндік береді. Әлеуметтік желіде Қазақстан Республикасы Президентін салтанатты ұлықтау рәсімі туралы пікір білдірген Сенат төрағасы Мәулен Әшімбаев осылай деп ой бөлісті, деп хабарлайды ҚазАқпарат.

«Бүгін Қазақстан Республикасының Президенті Қасым-Жомарт Кемелұлы Тоқаевты салтанатты ұлықтау рәсімі өтті. Осылайша, Мемлекет басшысы өзінің жеті жылдық қызметіне ресми түрде кірісті. Бұл – еліміздің саяси өміріндегі айтулы оқиға екені сөзсіз.

Өткен сайлауда азаматтарымыз Қасым-Жомарт Кемелұлына зор сенім білдіріп, әділеттілікке табан тірейтін мемлекет, экономика және қоғам құру бағдарламасын қызу қолдағаны белгілі. Президентіміз ұлтымыздың осы үмітін ақтау өзінің алдағы басты міндеті болатынын жариялады», - деп жазады Сенат төрағасы.

Сонымен қатар, Мемлекет басшысының сайлау алдында берілген уәделерді іске асыруға жол ашатын бастапқы әрі нақты жұмыс бағдарларын айқындап көрсеткеніне тоқталады.

«Президентіміз өз сөзінде заң алдында бәрінің тең болуы – мемлекетіміздің ұзақ мерзімді дамуының негізгі шарты екенін қадап айтты. Осы жолда елден заңсыз шығарылған барлық активті қайтару маңызды міндетке айналып келеді. Бұл үшін заңсыз шетел асқан капиталды қайтаруға қажетті рәсімдерді реттейтін заң жобасы әзірленетінін жеткізді.

Сондай-ақ, Президентіміз өңірлерді, оның ішінде ауылдарымызды өркендетуге айрықша көңіл бөліп отыр. Осыған байланысты Қасым-Жомарт Кемелұлының жаңа президенттік мерзімдегі бірінші Жарлығы ауылды дамыту мәселесін шешуге арналды. Сонымен бірге, ауқымды индустрияландыру, инфрақұрылымдарды салу және жаңғырту ісі де тың серпінмен қолға алынады.

Мемлекет басшысы өз сөзінде Конституцияға сәйкес билік тармақтары түгел жаңғыртылатынын айтты. Осыған сәйкес алдағы жылдың 14 қаңтарында Сенат депутаттарының сайлауы өтеді. Бұл біздің депутаттық корпустың сапалық тұрғыдан өзгеріп, өз жұмысын жаңа міндеттер аясында лайықты жалғастыруына мүмкіндік береді.

Әділетті Қазақстанды құру – баршамыздың ортақ мақсатымыз. Осы және алда жарияланатын басқа да бастамалар мен міндеттерді заңнамалық тұрғыдан сапалы әрі уақтылы қамтамасыз ету Сенаттың алдындағы басты міндеті болып қала береді», - дейді Мәулен Әшімбаев.

Айта кетейік, бүгін Мемлекет басшысы Қазақстан Республикасы Парламенті Сенатының депутаттарын сайлауды 2023 жылғы 14 қаңтарға тағайындау туралы Жарлыққа қол қойды.


Фото: senate.parlam.kz
Ұқсас жаңалықтар
Серіктестер жаңалықтары

Jańalyqtar