Семейде жаңа жағажай ашылады

СЕМЕЙ. ҚазАқпарат – Семей қаласында алдағы жазда жаңа жағажай ашылмақ, деп хабарлайды ҚазАқпарат тілшісі.

Биылғы суға түсу маусымында семейліктер жаңа жағажайға барып шомыла алатын болады. Бұл туралы баспасөз мәслихаты барысында шаһар басшысы Нұрымбет Сақтағанов мәлімдеді. Бүгінгі таңда жобалық-сметалық құжаттама әзірленіп, жағажайдың орны анықталған.

«Жағажай сол жағалаудағы Мелькомбинат ауданында болады. Қазір құжаттама тиісті органдарда келісуден өтіп жатыр», – деді қала әкімі.

Жағажайдан басқа тұрғындар 2019 жылы қайта құру үшін жабылған орталық саябақта демала алады. Аталмыш саябақтың ашылуы Халықаралық балаларды қорғау күнінде, яғни 1 маусымда жоспарланып отыр.

Естеріңізге сала кетсек, осыған дейін Семей қаласында жаңа көпір салынатындығын хабарлаған болатынбыз.