Семейде зейнеткерді алдап соққан туысы үйін өз атына аударып алған
ШҚО Полиция департаменті баспасөз қызметінің мәліметіне сүйенсек, «102» жедел арнасына 68 жастағы қала тұрғыны хабарласқан. Өз сөзінде ол туысының үйге тіркеуге тұру үшін сенімхат жасаймын деп алдап, үйін атына аударып алғанын жеткізді.
«Осының салдарынан жәбірленушіге келтірілген материалдық залал мөлшері 10 000 000 теңгені құрады. Жедел-іздестіру шараларын жүргізген тәртіп сақшылары күдіктіні ұстады. Жауап алу кезінде ол өз кінәсін мойындады. Оған қатысты келу туралы міндеттеме түрінде бұлтартпау шарасы таңдалды», - делінген ақпаратта.
Қазіргі уақытта аталған факті бойынша ҚР ҚК-нің 190-бабы 3-бөлігіне (Алаяқтық) сәйкес сотқа дейінгі тергеу амалдары жүргізілуде.
Естеріңізге сала кетсек, осыған дейін Семей тұрғыны арзан темекі аламын деп алаяққа 10 млн теңге бергенін хабарлаған едік.