15:15, 02 Маусым 2022 | GMT +6
Семейде 200-гектарға жайылған орман өрті ауыздықталды
СЕМЕЙ. ҚазАқпарат – Семейде кеше шыққан ірі орман өрті ауыздықталды, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, кеше түскі уақытта «Семей орманы» резерватының Жаңа-Семей филиалы Подгороднее орманшылығында өрт шыққан. Қатты желден қызыл жалын лезде жайылып кетті.
Өрттің жалпы ауданы шамамен 200-250 гектар аралығында. Абырой болғанда, зардап шеккен ешкім жоқ. Алдын ала мәлімет бойынша оттың шығу себебі – найзағайдан болуы мүмкін.
«Өртті сөндіруге департаменттен, жергілікті атқарушы органдардан, ТЖМ №68303 әскери бөлімінен 399 адам және 85 техника жұмылдырылды. Бүгін сағат 11.00-де тілсіз жау ауыздықталды», - деп хабарлады ведомство өкілдері.
Естеріңізге сала кетсек, осыған дейін Семейде орман өртеніп жатқанын хабарлаған едік.