Семей медицина университетінің түлегі әлемдік конкурс жүлдегері атанды
Бүкіләлемдік Қозғалыс бұзылысы қауымдастығы – бұл Паркинсон ауруы мен адамның өзге де қимыл-қозғалысының бұзылысына алып келетін ауруларды зерттеуге бағытталған медицина саласындағы ғалымдар мен дәрігерлердің әлемдік қауымдастығы. Осы қауымдастық өздерінің биылғы 24-ші Конгресін АҚШ-тың Филадельфия қаласында COVID-19 пандемиясына байланысты виртуалды форматта өткізді. Оған 146 елден 20 мың ғалым мен дәрігерлер қатысты.
Жалпы конгрестердің басты мақсаты - білім беру және әлемнің білікті мамандарынан тәжірибе жинап үйрену. Сондықтан осы конгрестің бір бөлімі - диагноз қоюға қиын соғатын өте сирек немесе клиникалық тұрғыдан өте өзекті жағдайларды көрсететін видеосайыс. Ал сайыстың өзі конгресс шеңберінде 13-ші рет өткізіліп отыр. Сайысқа қатысуға әлемнің түкпір-түкпірінен ниет білдіргендер көп болды. Алайда оның ішінен ең өзекті және конгресс қатысушыларына сапалы және нақты практикалық тәжірибе береді деген 12 клиникалық мысал ғана іріктеліп алынып, конгресс сайысына қатысу құқығын алады. Сайысқа қатысушы ғалымдардың еңбегін әлемнің ең білікті невролог дәрігерлері бағаласа, бұлардан өзге тәуелсіз екі білікті дәрігер маман клиникалық материалды талқылады.
Міне, осы таңдалып алынған 12 үміткердің арасынан Рауан Бағданұлы диагноз қоюы өте қиынға соғатын, бірақ генетикалық анализ жасай отырып молекулалық диагноз қойған клиникалық мысалды келтіріп сайыстың қола медалін жеңіп алды. Жүлдегерлерді анықтау конгреске қатысқан әлем ғалымдарының онлайн дауыс беруі арқылы жүргізілген.
Рауан Қайыржанов – Семей мемлекеттік медицина академиясының емдеу ісі факультетінің түлегі. Аталған оқу орнын 2007 жылы тәмамдап, 2008 жылдан бері неврология саласында қызмет атқарып келеді. 2014-2016 жылдар аралығында Лондон университетінің Неврология ғылыми-зерттеу институтында клиникалық неврология мамандығы бойынша ғылыми магистратурада оқыған.
Қазіргі таңда ол Лондон университетінің Неврология ғылыми-зерттеу институтының стипендиясын ұтып алып, неврология және нейрогенетика саласы бойынша докторонтурада оқып жүр.
«Менің ғылыми жұмысым - Орта Азия елдері мен Қазақстандағы нерв жүйесінің тұқым қуалайтын ауруларын зерттеу арқылы генетикалық себебін табу. Ұақ жылдар бойы алған білімімді әлемде әлі ашылмаған тек Орта Азия мен Қазақстан халықтарына ғана тән жаңа ауру шақыратын гендерді тауып, ол ауруларды генетикалық тәсілдермен емдеу жолдарын ашуға арнап жүрмін. Қазірде Орта Азия және Қазақстаннан нерв жүйесінің тұқым қуалайтын ауруларды шақыратын бірқатар жаңа гендер аштық. Мақсатым – еліме, адамзатқа пайдамды тигізу», - дейді Рауан Бағданұлы.
Ол Қазақстан мен Орта Азия елдеріндегі клиникалық диагноз қоюға қиын нерв жүйесінің тұқым қуалайтын аурулары бар адамдарға қымбатқа түсіп, қолдары жете бермейтін генетикалық анализдерді тегін жасап жүр.
Айта кетейік, әлемдік сайыстың қорытындысы шығысымен одан хабардар болған украиналық дәрігер ғалым Рауанды жеңісімен құттықтап, өз емделушісінің емі табылмай отырған дертіне дәл осындай анализді жүргізіп көмектесуін сұрапты.
