Сайрамда елді мекендер толықтай орталықтандырылған ауыз су жүйесіне қосылған

САЙРАМ. ҚазАқпарат - Түркістан облысы, Сайрам ауданының тұрғындарын сапалы ауыз сумен қамтамасыз ету мақсатында биыл 4 елді мекеннің тозығы жеткен ауыз су жүйелері орташа жөндеуден өткізілген.

Нәтижесінде ауданның 42 елді мекені 100% орталықтандырылған ауыз су жүйесімен қамтылған, деп хабарлайды ҚазАқпарат тілшісі.

Бүгінде аудандағы 12 елді мекенде табиғи газ жүйелерінің құрылыс жұмыстары аяқталған. Көгілдір отын берілген жағдайда 27 164 тұрғын табиғи газбен қамтылмақ. Ал қазіргі таңда 5 елді мекенге газ беру жұмыстары жүргізілуде. Сонымен қатар, биыл автомобиль жолдарын дамытуға республикалық, облыстық және жергілікті бюджеттен қаржы қаралып, ұзындығы 89,9 шақырым болатын 45 жолға жөндеу жұмыстары жүргізіліп, асфальт төселген. Бүгінгі таңда 45 нысанда жөндеу жұмыстары аяқталған. Тағы облыстық маңызы бар «КХ-3- Көксәйек - Шаян - Аққала - Сарқырама» жолының 5 шақырымы жөндеуден өтіп, нысан 2021 жылға өтпелі болып отыр.

Жыл қорытындысы бойынша пайдаланылатын жолдардың сапа үлесін 52,7%-дан 59,4%-ға дейін арттыру көзделуде.