Сайлауға жастар көп қатысты – сарапшы
«Кеше ғана ауа райы шамамен -40 градус суық болған. Бүгін күн жылынып кетеді деп ешкім ойлаған жоқ және осындай аязды күні осыншама халық сайлауға қатысады деп ойлаған жоқпын», - дейді Еуропалық құқық және адам құқығы сараптамалық институтының директоры Марат Башимов.
Оның айтуынша, эпидемиологиялық жағдайға байланысты қауіпсіздік шаралары сақталып, сайлау жақсы ұйымдастырылған.
«Сондай-ақ, дауыс беріп жатқан жастарды көп байқадым. Сайлауалды науқанда дебат өтті. Оның қандай деңгейде өткенін әртүрлі бағалауға болады, бірақ ең бастысы – оған әртүрлі сарапшылар қатысты. Дебатқа қатысу –қатыспау құқықтарын да пайдаланды. Бұл үлкен өзгеріс деуге болады», - дейді ол.
Еске сала кетсек, бұған дейін Sailau Talks-2021 сарапшылары өтіп жатқан сайлаудың маңызын талқылайтынын жазған болатынбыз.
Іс-шараны Қазақстан саяси ғылымдар қауымдастығы «ҚазАқпарат» Халықаралық ақпарат агенттігінің қолдауымен ұйымдастырып отыр.