Қолданушы баптаулары
Қолданушы баптаулары
+7 (701) 759 90 19 Лента
USD 371.56 EUR 422.43
RUB 5.56 CNY 53.51
Jańalyqtar

Сәуле Досжанованың «Үлкен үйдегі үрей» атты прозалық кітабы жарық көрді

2014 жылғы 15 қаңтар 08:54 120
Бөлісіңіз:
Сәуле Досжанованың «Үлкен үйдегі үрей» атты прозалық кітабы жарық көрді

АСТАНА. 15 қаңтар. ҚазАқпарат - Жуырда мемлекеттік тапсырыс бойынша «Жазушы» баспасынан «Жаңа заман әдебиеті» сериясымен ақын, Қазақстан Жазушылар одағының мүшесі Сәуле Досжанованың «Үлкен үйдегі үрей» атты прозалық кітабы жарық көрді.

Автор бұл кітабын 2007 жылдан 2010 жылға дейін, яғни, үш жыл жазғанын айтады. «Осы «Үлкен үйдегі үрейді» жазуға көп іздену керек болды. Бұл туындының жазылуына кездейсоқ оқиға себеп болды. 2005 жылы жолдасым Дүкең (Дүкенбай Досжан) екеуміз балаларды алып, Қарағанды облысының Қарқаралы ауданына демалысқа барғанбыз. Қарқаралы кентіндегі Құнанбай салдырған мешітте болып, есік алдына шыққанымызда, қарама-қарсы бетте тұрған үш қабатты ескі үй көзімізге түсті. Сол үйдің мән-жайын сұрап едім, оның өзіндік тарихы бар екенін білдім. Ол ХІХ ғасырда салынған дәулетті адамның үйі екен»,- дейді Сәуле Досжанова.
Шағын романда шытырман оқиғалар желісі оқырманды өзіне тартып әкетеді. Автор өз шығармасында адамның асыл қасиеттерін бағалау қажеттігін, ал енді біреуге жасалған қиянаттың ешқашан кетпейтінін, ғасырлар өтсе де, ақиқаттың жарыққа шығатынын тарихи кезеңдерде болған оқиғалар арқылы бере білген.
Осы кітапқа еніп отырған екінші туынды - «Жатқа туған бала» повесі. Ол қазіргі заманның әлеуметтік-демографиялық мәселелерін көтереді. «Адамның бір қызығы бала деген» деп Абай атамыз айтқандай, әрбір ата-ана сәбилі болғысы келеді. Алайда, бүгінгі заманда перзент сүйе алмайтындардың қатары көбейіп тұр. Бұл шығармада тұрмыс тауқыметін көп шеккен жанның құрсақ ана (суррагат-ана) болып, өзге отбасына бала тауып берген тағдыры бейнеленген. Жатқа туатын перзентін тоғыз ай көтерген кездегі ананың толғанысы аталған хикаятқа арқау болған.
Бұл повестің жазылуына қазақтың танымал ғалым қызы, Қазақстандағы Бірінші денеден тыс ұрықтандыру лабораториясы - «Экомед» емханасының жетекшісі, репродуктолог-эмбриолог, биология ғылымдарының докторы Салтанат Берденқызы Байқошқарованың елге сіңіріп келе жатқан еңбегі үлкен әсер етті.
Осы кітаптағы үшінші туынды - «Екі күйеулі әйел» повесі. Қазіргі заманда болған оқиға бойынша жазылған. Кітап авторы ол әйелмен ауруханада танысқан екен. Басты кейіпкер тағдырдың жазуымен бірінші күйеуімен ажырасып, екінші рет тұрмысқа шыққан жан. Бірінші жолдасы тағдыр тәлкегіне түсіп, қаңғыбас болып жүрген жерінен балалары өзінің әкесі болған соң, тауып әкеліп, үйінің екінші жағынан есік шығарып, бағып, күтеді. Ол әйел: «Өзге жұрт соған орай мені екі күйеуі бар әйел деп айтады. Бірақ мен онымен баяғыда ажырасып кеткенмін. Қазіргі күйеуіммен бөлек тұрамын. Мен балаларымның соншалықты мейірімділігіне ризамын. Кезінде сол әкесі бізге жақсылық көрсетпей, бес баламен мені қаңғытып жіберіп еді»,- деп басынан кешкен тағдырын баяндап берген болатын.
Қаламгердің жаңа кітабы көпшілік оқырманға арналған.

 

Біздің каналымызға жазылыңыз:

Басты сөздер: Әдебиет,
Бөлісіңіз:
Загрузка...
Сондай-ақ... оқыңыз
Загрузка...
ONLAIN QYZMETKERLER
REDAKTOR
Ербол Жанат
Ербол Жанат
954-059
REDAKTOR
Айдар Оспаналиев
Айдар Оспаналиев
954-059
MURAǴAT