Сауда министрі азық-түлікті қымбаттатпау жолдарын айтты
«Коронавирус пандемиясының келесі толқыны мен жаңа жыл қарсаңындағы дәстүрлі бағаның өсу қауіпін ескере отырып, бағаны тежеу бойынша мынадай шаралар қабылдау ұсынылады. Біріншіден, әкімдіктер тұрақтандыру қорларындағы азық-түлік көлемі мен түрлерін қайта қарап, «айналым схемасы» бойынша қаржыландыруды кеңейту керек. Екіншіден, Ауыл шаруашылығы министрлігі әлеуметтік маңызы бар азық-түлік тауарларының бағасын тұрақтандыру үшін Азық-түлік корпорациясы базасындағы бидай резервтерін қадағалауы қажет», - деді Бақыт Сұлтанов Үкімет отырысында.
Үшіншіден, министр әкімдіктерге шекті рұқсат етілген бөлшек сауда бағасын белгілеуді ұсынды. Сондай-ақ, бағалардың негізсіз өсуін бақылап, шекті бағаның сақталуын қамтамасыз ету қажет.
Бұған дейін Б. Сұлтанов азық-түліктің ең қымбат бағасы Нұр-Сұлтанда тіркелгенін айтып, шекті баға белгілеу құралын пайдаланбай отырған әкімдіктерді сынаған еді.