Сатуға қойылған полиция көліктерінің бағасы 250 мыңнан басталады

АЛМАТЫ. ҚазАқпарат - Алматы қаржы басқармасы бұрын полицейлерге тиесілі болған автокөліктерді сатылымға шығарды, деп хабарлайды ҚазАқпарат тілшісі. 

Автокөліктердің бастапқы бағасы 250 мың теңгені құрайды, ал олардың жағдайының қандай екенін gosreestr.kz электронды сауда алаңынан білуге болады.

Сатып алушыларға 2009-2011 жылдары шығарылған Daewoo Nexia, Volkswagen Santana Vista, ГАЗ «2705 14» маркалы көліктер ұсынылады. Бұлардың бағалары 250 мың теңгеден басталып, 400 мыңға дейін барады.

Саудаға қатысам деушілер 37 529 теңге көлемінде кепілдік төлеуі керек. Бәссауда биыл 11 шілдеде басталады.

Бұл автокөліктер бұрын Алматы ІІД -не тиесілі болған.

Бәссауда шарты бойынша, автокөлік  ең жоғары  баға ұсынған қатысушыға сатылады.

Ал бәссауда аяқталар уақытқа дейін бағаны ешкім көтермесе, соңғы тілек білдірген адам жеңімпаз саналады.

Айта кету керек, бәссауда нәтижесі бойынша сатылған нысандарға хаттама толтырылып, сауда нәтижесі сатушы мен сатып алушының электронды кілтін қолдану арқылы  реестр порталында расталады.

Бұдан өзге, сатып алу - сату шарты реестр порталында  электронды форматта бекітіледі. Сауда нәтижесі туралы хаттамаға қол қойылған күннен бастап 10 күннің ішінде шарт екіжақтың электронды кілтімен расталуы қажет.