Сарыағаш тұрғыны қызын 17 жігіт жабылып зорлағанын айтып арызданды
«Әлеуметтік желіде Сарыағаш ауданында қызды зорлаған 17 ер адам туралы ақпарат тарап жатыр. Осыған байланысты айтарымыз - биыл 25 мамырда полицияға Сарыағаш ауданының тұрғыны арызданған. Онда әйел өзінің 17 жасар қызын ұрлап кеткенін хабарлаған. Аталған жайт ҚР Қылмыстық кодексінің 125-бабына сай «Адам ұрлау» фактісі ретінде тіркелді», - делінген хабарламада.
Полиция департаменті баспасөз қызметінің мәліметінше, тәртіп сақшылары 2004 жылы туған қыздың жұмысқа кетіп, содан әрі қарай жоғалғанын анықтаған.
«Осыған байланысты полиция барлық қажетті жедел-іздестіру шараларын жүргізді, нәтижесінде ол бір тәулік ішінде табылып, ата-анасына қайтарылды. Бір аптадан кейін, яғни 31 мамырда әйел полицияға ұрлау дерегі бойынша қылмыстық істі тоқтату туралы нотариалды куәландырылған өтінішпен жүгінді», - делінген хабарламада.
Ресми ақпаратта айтылғандай, араға аз уақыт салып 10 маусымда ауыл тұрғыны қайтадан полицияға жүгініпті.
Бұл жолы қызын 17 ер адам зорлады деп арызданған.
«Арыз ҚР Қылмыстық кодексінің 120-бабы 3-бөлігі бойынша тіркеліп, сараптама тағайындалды. Сот-медициналық сараптама қызметкерлері зорлық-зомбылық дерегін жоққа шығарды. Сондай-ақ жәбірленушінің анасы қызының киімдерін өртеп жібергені анықталды. Осыған байланысты сарапшылар экспертиза жүргізе алмады», - делінді ведомстводан.
Сонымен қатар бүгінде сотқа дейінгі тергеу амалдары жүріп жатқандығы айтылды.
«Сараптамалар кешені тағайындалды. Оның нәтижесі бойынша заңды процессуалдық шешім қабылданады», - дейді департаменттен.