Сарыағаш ауданында егін егу науқаны басталды

ТҮРКІСТАН. ҚазАқпарат – Түркістан облысының Сарыағаш ауданында егін егу науқаны басталды, деп хабарлайды ҚазАқпарат облыс әкімінің баспасөз қызметіне сілтеме жасап.

«Сарыағаш ауданының экономикасын дамытудың негізгі басымдықтарының бірі – ауылшаруашылық саласы. Аталған саланы дамыту мақсатында аудан шаруалары көктемгі дала жұмыстарын жүргізуді қолға алып отыр. Ауданда екі-үш өнім алу жобасы бойынша егін егу жұмыстары басталды.

Қазіргі таңда аудан аумағында 315 га жерге қырыққабат және 130 га жерге картоп егілді. Сонымен қатар, осы жылдың дәнді дақылдар өнімі үшін 30 мың га жерге күздік бидай себілді», делінген хабарламада.

Биыл ауданда жалпы 70 мың гектарға жуық жерге егін егу жоспарланып отыр. Атап айтқанда, 42 мың 800 гектарына астық, 2 200 гектарға майлы дақылдар, 4 000 га жерге картоп, 10 мың гектардан аса көкөніс, 1 200 га бақша және 9 мың га жерге мал азығы дақылдары егіледі.