Sary tústi jedel járdem kólikterine turǵyndar kóbirek jol beredi - Tımýr Muratov
Onyń aıtýynsha, elordalyq jedel járdem stansıasynyń brıgadalary orta eseppen saǵat saıyn naýqastar shaqyrǵan mekenjaıǵa attanady.
«2018 jyldyń 8 aıynda 209 129 shaqyrtý boldy, ıaǵnı bir feldsherlik brıgada saǵat saıyn táýligine orta eseppen 18 shaqyrtýǵa barady. Naýqastarǵa jetý ýaqyty da jyldan-jylǵa qysqaryp keledi. Máselen, 2018 jyldyń 8 aıynda bizdiń bizdiń brıgadalar naýqas ómirine qaýip tóndirgen kezek kúttirmeıtin 1 sanattaǵy shaqyrtýlarǵa shamamen 10 mınýtta jetti. Ázirge jetý ýaqytynan respýblıka boıynsha 3 orynda turmyz», - dedi T. Muratov.
Onyń aıtýynsha, brıgadalar naýqastarǵa kómektesýde túrli qıyndyqtarǵa tap bolady.
«Barlyq brıgadalar shaqyrtý ornyna bara jatqanda kólik keptelisine tap bolady. Kez kelgen adam sırena daýsyna qaramastan, júrgizýshilerdiń jedel járdem kóligine jol bermeýine kýá bolǵan shyǵar», - dep atap ótti Tımýr Muratov.
Bas dáriger jedel járdem kóliginiń jańa dızaıny men dabylynyń naýqasqa jetýde mańyzdy ról atqaratynyn jetkizdi.
«Jańa ózgeristerdiń barlyǵyn qýana-qýana qabyldadyq. Sary tústiń kózge birden baıqalatyny belgili. Naýqastardyń ómirin qutqarý úshin oqıǵa ornyna jedel jetý maqsatynda kólikterimiz sary túske boıaldy. Ásirese, Astanada tuman, qar, jańbyrly aýa raıy jıi bolady. Burynǵy aq tústi kólikter asa baıqala bermeıtin. Bul brıgalarǵa da, ózge júrgizýshilerge de qolaısyzdyq týdyrdy. Qazir jol ústindegi qozǵalys jaqsardy, turǵyndar jol bere bastady jáne naýqasqa jetý ýaqyty qysqarýda», -
Standartqa sáıkes, Qazaqstandaǵy jedel járdem kóligi naýqasty tasymaldaýda tańǵy 8:00-den 23:00-ge deıin jaryqty jáne sırenany qoldanady. 23:00-den keıin naýqasty apara jatqan kólikter dybyssyz jaryqty qoldanady.