Рудный кәсіпорындары экспорт көлемін ұлғайтпақ
Рудный қаласында «Nur Otan» партиясының «Индустриалды даму» бағытындағы аймақтық комиссия мүшелерінің көшпелі отырысы өтті. Партиялықтар мен мемлекеттік орган өкілдері бірқатар кәсіпорындарды аралап, индустриалды-инновациялық бағдарламалардың іске асырылу барысымен танысты.
Комиссия мүшелері алдымен Рудныйдағы «Жас Қанат-2006» құс фабрикасына барды. Жаңғырту жұмыстарының үш кезеңінен өткен кәсіпорында, барлық инфрақұрылым жүйелері өткізіліп, жоғары технологиялық жабдықтар сатып алынған. Инвестиция көлемі 3 млрд теңгеден асады. Сұрыптау цехында сағатына 120 мың жұмыртқа шығаратын Nabel атты жапондық жабдық орнатылған. Өндірісті автоматизациялау арқылы 8 сағаттық жұмыс күнінде 1 млн жұмыртқаға дейін тасымалдауға болады.
«Жаңғырту шаралары аясында жұмыртқа, ет және т.б. өнімдерді терең өндеудің автоматты желісін қосуды жоспарлап отырмыз. 2019-2021 жылдар аралығында тұқымды репродуктордың құрылысы басталады. Бұл жабдық толық автоматтандырылған. Жобаның сәтті жүзеге асуы импорт көлемін 40% төмендетуге мүмкіндік береді», - дейді «Жас-Қанат 2006» ЖШС дамыту бойынша директоры Александр Коростылев.