Qazaqstandyq fermerler «agronom planshetin» paıdalanady

ASTANA. QazAqparat - QR Aýyl sharýashylyǵy vıtse-mınıstri Arman Evnıev agroónerkásip keshenin tsıfrlandyrýdyń paıdasy týraly aıtyp berdi, dep habarlaıdy QazAqparat tilshisi.

«Mysaly, bizde bir joba bar. Oǵan sáıkes, meteostansıalar ornatylady da, arnaıy meteorologıalyq qyzmet engiziledi. Sonyń arqasynda fermerler aldyn ala jospar jasap, dala jumystaryn ýaqytynda atqara alady. Jańa qyzmette aýa temperatýrasy men ylǵaldylyǵy, jeldiń jyldamdyǵy, aldaǵy eki-úsh aptanyń boljamy - bári-bári bolady. Sonda sharýalar jerdi óńdeý, vegetasıa jasaý jáne taǵy basqa mańyzdy sharalardy aldyn ala josparlaı alady. Árıne, ondaıda egistiktiń ónimdiligi de artady. Bylaısha aıtqanda, atalǵan bastama «agronom planshetine» aınalady», - dedi A.Evnıev búgin Astanada ótken Qazaqstan-Germanıa forýmynda. Shara barysynda aýyl sharýashylyǵy salasyndaǵy sıfrlandyrý máseleleri talqylandy.

Vıtse-mınıstrdiń sózine qaraǵanda, búginde «elektrondy agroónerkásip kesheni» atty baǵdarlama da bar. Sonyń aıasynda aýyl sharýshylyǵyn tsıfrlandyrý sharalary atqarylady. «Bizdiń josparymyzǵa sáıkes, 2021 jylǵa deıin jańa tehnologıalardy qoldanatyn fermerlerdiń sany 20 protsentke jetedi. Endi, bul - aldyn ala jospar. Qazirgi kezde 30-dan astam joba bar. Sonyń barlyǵyn iske asyrý jospary men merzimi bekitildi», - dep atap kórsetti A.Evnıev.

Aıta keteıik, búgingi forým aıasynda ǵalymdar agroónerkásip keshenin sýbsıdıalaýdyń jańa ádisin usyndy.