Путин, Рухани және Ердоған Астанадағы уағдаластықтар аясында Сочиде бас қосады

АСТАНА. ҚазАқпарат - Түркия, Ресей және Иран президенттері Сочиде бас қосып, Сирияда зорлық-зомбылықты азайту бойынша қадамдарды қарастыратын болады. Бұл туралы Түркия басшысының баспасөз хатшысы Ибрагим Калын мәлім етті, деп хабарлайды Анадолы агенттігі.  

Калынның айтуынша, 22 қараша күні өтетін үшжақты кездесуде Түркия, Ресей және Иран президенттері Астанада қол жеткізілген келісімдер аясында Сирияда зорлық-зомбылықты азайту бойынша қадамдарды қарастыратын болады. Сондай-ақ деэскалация аймақтарындағы мәселе сөз болады.

«Онымен қоса, мемлекет басшылары Сирияға гуманитарлық көмек жеткізу мәселелерін, сондай-ақ кепілгер елдердің БҰҰ Қауіпсіздік Кеңесінің № 2254 қарарына сәйкес Сириядағы ахуалды саяси реттеу бойынша женевалық процеске қосуы мүмкін үлестерін талқылайтын болады», - деп атап өтті Калын.