Прокурор Жомарт Ертаевты 11 жылға бас бостандығынан айыруды сұрады

АЛМАТЫ. ҚазАқпарат – Прокурор экс-банкир Жомарт Ертаевқа 11 жыл бас бостандығынан айыру жазасын сұрады. Бұл туралы Алмалы аудандық сотының баспасөз қызметі мәлім етті, деп хабарлайды ҚазАқпарат тілшісі.

Мемлекеттік айыптау күдіктінің кінәсін жеңілдету фактілерін ескерді: Ертаев кінәсін мойындады, қылмыстық істі тергеуге көмектесті, шығынды ішінара өтеді, сондай-ақ ол - кәмелет жасына толмаған балалардың әкесі.

«Прокурор аса ауыр жаза мен онша ауыр емес жазаны біріктіру арқылы 11 жылға соттауды сұрады. Онымен қоса мүлкін тәркілеу, 5 жыл материалдық жауапкершілікпен байланысты коммерциялық және қаржы қызметінен айналысу құқынан айыру, жазасын орташа қауіпсіздіктегі қылмыстық-атқару жүйесі мекемесінде жазасын өтеуді талап етті», - деп хабарлады соттағылар.

Біз бұған дейін Жомарт Ертаевтың ісіне қатысты соттың басталғанын хабарлаған едік.

Естеріңізге сала кетейік, Жомарт Ертаев өткен жылдың мамырында Мәскеуде ҚР ІІМ мен Интерполдың Ұлттық орталық бюросының өтініші бойынша ұсталған болатын. ҚР ІІМ мәліметінше, Ертаев аса ірі көлемдегі алаяқтығы үшін халықаралық іздеуде болған.

Кейіннен Жомарт Ертаев кінәсін мойындады .