Президент Жолдауын іске асыру жоспары әзірленеді

НҰР-СҰЛТАН. ҚазАқпарат - ҚР Президенті Қасым-Жомарт Тоқаевтың Қазақстан халқына Жолдауын іске асыру жоспары әзірленеді. Бұл туралы ҚР Премьер-Министрінің бірінші орынбасары - Қаржы министрі Әлихан Смайылов айтты, деп хабарлайды ҚазАқпарат тілшісі.

«Шығындарды оңтайландыру және активтерді инвестициялық басқарудың сапасын жақсарту мақсатында Үкіметке бірыңғай әлеуметтік қор құру және бір әлеуметтік төлем енгізу жолымен әлеуметтік қамтамасыз етудің бюджеттен тыс жүйесін шоғырландыру мәселесін зерделеу тапсырылды. Сондай-ақ жергілікті бюджеттерді қалыптастыруға халықты нақты тарта отырып, барлық деңгейлерде бюджет процесін ұйымдастыру қолға алынады», - деді ол бүгін Мемлекет басшысының Қазақстан халқына Жолдауын талқылауға арналған Үкімет отырысында.

Бірінші вице-премьердің атап өтуінше, аудандық, қалалық және ауылдық билік деңгейлері жергілікті маңызы бар міндеттерді шешуде экономикалық жағынан неғұрлым дербес болуы үшін тиісті заңнамалық актілер қабылданады.

«Жалпы, біз Жолдауда көрсетілген тапсырмаларды іске асыру және орындау бойынша тиісті іс-қимыл жоспарын әзірлейтін боламыз. Президент Жолдауын іске асыруға қажетті қаражат Парламент Мәжілісіне енгізілген үш жылдық бюджет жобасында қарастырылады», - деді Ә.Смайылов.