Президент сайлауға белсене қатысқан азаматтарға алғыс айтты

Автор:  
Есімжан Нақтыбай

Президент сайлауға белсене қатысқан азаматтарға алғыс айтты

АСТАНА. ҚазАқпарат – Мемлекет басшысы Қасым-Жомарт Тоқаев VIII сайланған Қазақстан Республикасы Парламентінің бірінші сессиясында сайлауға белсене қатысқан азаматтарға алғыс айтты, деп хабарлайды ҚазАқпарат тілшісі.

«Реформаларымыз «Күшті Президент – ықпалды Парламент – есеп беретін Үкімет» қағидасына негізделді. Бұл қағида – мемлекетіміздің басты тірегі.

Референдумнан кейін Конституцияның жаңа талаптарына сай билік тармақтарын түгел жаңғыртуға кірістік. Халықтың да көптен күткені осы еді. Конституциялық өзгерістерге сәйкес Президент сайлауы, Сенат, Мәжіліс және мәслихаттар сайлауы өтті.

Референдумды қосқанда бір жылға жуық уақыттың ішінде өте маңызды 5 саяси науқан өткізілді. Оның бәрі аса күрделі кезеңге тұспа-тұс келді. Қаншалықты күрделі болса да, біз еліміз үшін өте қажет жолды қысқа мерзім ішінде жүріп өттік. Қазақстанның жаңарып, жаңғыра бастағанына жұрттың көзі жетті», - деді Президент.

Мемлекет басшысы кешегі сайлауда партиялармен қатар, көптеген азамат бір мандатты округтен өзін-өзі ұсынғанын атап өтті.

«Осылайша, халқымыз маңызды өзгеріске өз үлесін қосуға дайын екенін дәлелдеді. Елімізде жаңа азаматтық, саяси мәдениет қалыптасып жатыр. Мен сайлауға белсене қатысқан барша азаматқа алғыс айтамын», - деді Қасым Жомарт Тоқаев.

Айта кетейік, елордада Мемлекет басшысы Қасым-Жомарт Тоқаевтың қатысуымен VIII сайланған Қазақстан Республикасы Парламентінің бірінші сессиясы өтіп жатыр.





Серіктестер жаңалықтары