Полиция қызметкерін тістеп алған хромтаулық азамат үш жылға сотталды

АҚТӨБЕ. ҚазАқпарат - Полиция қызметкерін тістеп алған Хромтау қаласының тұрғыны үш жылға сотталды, деп хабарлады Ақтөбе облыстық сотының баспасөз қызметінен.

Қылмыстық іс материалында 2014 жылдың 12 қыркүйегінде Хромтау аудандық ішкі істер бөлімінің учаскелік инспекторы мен оның көмекшісінің қаладағы мейрамханалардың біріне келушінің қоғамдық тәртіпті бұзғанына қатысты шақыртумен келгені айталған.

«Ер адам тәртіп сақшыларының заңды талаптарын орындамай, учаскелік инспекторды оң жақ қолының білегінен тістеп алған. Күдікті құқық қорғау органдары қызметкерінің денсаулығына жеңіл дәрежедегі зиян келтірді», - делінген хабарламада.

Сот отырысында сотталушы ҚР ҚК-нің 321-бабының 1-бөлімімен өзіне тағылып отырған айыпты толық мойындады.

Хромтау аудандық соты сотталушыны кінәлі деп танып, қатаң режімдегі түзеу колониясында жазасын өтеуге үш жылға бас бостандығынан айыру үкімін кесті. Сот үкімі заңды күшіне енген жоқ.