Польшада іздестірушілер 56 қазақстандық майдангердің зиратын тапты

НҰР-СҰЛТАН. ҚазАқпарат - Ұлттық әскери-патриоттық орталықтың әскери-тарихи мұражайына Екінші дүниежүзілік соғыс кезінде Польшада қаза тапқан және сонда жерленген 50-ден астам қазақстандық жауынгерлердің тізімі берілді, деп хабарлайды ҚазАқпарат Қорғаныс минстрлігінің баспасөз қызметіне сілтеме жасап.

Жарты жыл ішінде поляк мекемелері жерлеу орындарын іздеу және қазу жұмыстарын жүргізген. Майданға Қазақ ССР-нан шақырылған Қызыл армия жауынгерлерінің 56 зираты табылды. Олардың аты-жөндерін, қандай шайқаста қаза тапқанын анықтау үшін ауқымды жұмыс істелді.

Қазақстандағы Польша Республикасының Елшілігі жанындағы әскери атташе Петр Вуйтович қызыл әскерилердің тізімін салтанатты түрде әскери-тарихи мұражайдың басшысына тапсырды.

«Жеңістің 75 жылдық мерейтойы қарсаңындағы бұл іс-шараның маңыздылығын айта өту керек. Тізімдегі әрбір жауынгер біреудің із-түссіз кеткен туысы болуы керек. Атасын іздеп жүрген ұрпақтары да бар шығар. Олар үшін Отанды ерлікпен қорғаған жауынгерлердің қайда жерленгенін білуі өте маңызды», - деп атап өтті музей бастығы Нұртаза Әсілов.

Тізімді алғаннан кейін мұражай жауынгерлердің туыстарын іздейді.