Петропавлдағы көпсалалы жабдықтар зауыты ресейліктермен 140 млн. теңгені құрайтын келісімдерге қол қойды (ФОТО)
Солтүстікқазақстандықтар бұрғылау қондырғыларына қажетті өнімдер шығарады.
Зауытта жыл сайын жаңа жабдықтар сатып алынады. Өткен жылы екі жонғыш білдек, биыл тағы үшеуі сатып алынды. Зауыттағылар жабдықтарды жаңарту өнімділікті 2-3 есеге жақсартып қана қоймай, оның сапасының артуына септігін тигізетіндігіне сенімді. Биылғы жылы зауытта Ресейге экспортқа жіберу үшін тағы бірнеше жаңа бөліктерді жасай бастады.
«Жыл басынан бері ресейлік кәсіпорындармен шамамен 140 млн. теңгені құрайтын келісімдерге қол қойылды. Біз Қорған аймағында шығарылатын бұрғылау қондырғыларына қажетті құрал-жабдықтарды жасаймыз. Түмен өңірі үшін тиектерді жасауды игердік», - деді Петропавлдағы «Көпсалалы жабдықтар зауыты» ЖШС-нің директоры Сергей Федосеев.
Зауытта барлығы 200-ден астам техника жұмыс істейді, күн сайын үш ауысыммен жұмыс істейтін мұнда 1000-нан астам құрал-сайман жасалады.
Бүгінде серіктестікте шамамен 230 адам қызмет етуде. Жақын болашақта мұнда мұнай-газ саласындағы жабдықтардың бөлшектерін жасауды игеру көзделіп отыр.