Петропавлда жаңажылдық мереке іс-шаралары 6 күн бойы өтеді
Петропавл қаласының әкімдігі баспасөз қызметінің мәліметінше, Жаңа жылға орай мерекелік іс-шаралар 29 желтоқсан күні басталып, 3 қаңтарға дейін жалғасады.
Жоспарға сай бүгін сағат 19.00-де қала әкімдігі ғимаратына қарсы орналасқан орталық алаңда би кеші өтеді. Сондай-ақ сұрақ-жауап ойыны ойнатылмақ.
30 желтоқсан күні «Жаңа жылды бірге қарсы алайық!» мерекелік ойын-сауық бағдарламасы ұйымдастырылады. Іс-шара шырша құрылған басты алаңда - облыс әкімдігі ғимараты маңында өтеді. Қала тұрғындары мен қонақтары сағат 19.00-ден 21.00-ге дейін көңіл көтере алады.
31 желтоқсан күні басты алаңда «Қош келдің, Жаңа жыл!» бағдарламасы жоспарланған. Сағат 19.00-де басталатын сауық, 21.00-де мерекелік отшашумен қорытындыланады.
1 қаңтар күні мерекелік іс-шара сағат 16.00-де орталық алаңда жалғасады. Бұл күні де өнерпаздардың концерттік бағдарламасы өтеді.
2-3 қаңтар күндері мерекелік бағдарлама сағат 18.00-де орталық алаңда басталады. Сауық кеші сағат 20.00-ге дейін жалғасады.
Бұған дейін Петропавлда мұз алаңдарын салуға бюджеттен 75 млн теңге бөлінгенін айтқан едік. Ал қала демеушілердің қаржысына безендірілді. 25 желтоқсан күні өңірдің басты шыршасының шамы жағылды.