Петропавлда бірнеше велосипед ұрлаған адам ұсталды

ПЕТРОПАВЛ. ҚазАқпарат - Петропавлда полицейлер жедел-іздестіру шаралары кезінде Петропавл тұрғынынан 15 велосипед пен скутер тәркіледі.

Бұл туралы СҚО ІІД баспасөз қызметінен хабарлады.

«Азаматтар көшеде тұрған адамнан велосипедтерді едәуір арзан бағаға сатып алған. Кейін белгілі болғанда, ол бұл қымбат көлік құралдарын көп қабатты үйдердің аулалары мен подъездерінен ұрлаған. Қалалық ІІБ жедел қызметкерлері ұрлық жасаған 35 жастағы азаматты ұстады», - делінген хабарламада.

Аталған факті бойынша қылмыстық іс қозғалды. Күдіктіге ешқайда кетпеу туралы қолхат берілді.

Ұсталған азамат 5 жылға дейін бас бостандығынан айырылуы мүмкін. Ал арзан тауар сатып алғандарға ақшасын қайтаруы екіталай.