Петропавлда бірнеше күн бұрын жоғалған 5 жасар бала табылды

ПЕТРОПАВЛ. ҚазАқпарат - Солтүстік Қазақстан облысында бірнеше күн бұрын жоғалып кеткен 5 жасар бала табылды, деп хабарлайды ҚазАқпарат тілшісі.

СҚО Полиция департаментінің баспасөз қызметінен мәлім еткендей, балдырғанды 7-11 наурыз аралығында полицейлер, волонтерлар, Ұлттық гвардияның әскери қызметшілері іздестірген.

Ұл бала қала маңындағы Қызылжар ауданының Бескөл ауылында тұрады. Оның фотосы Петропавл қаласының, қала маңындағы елді мекендердің әр жеріне жабыстырылған болатын. Сондай-ақ әлеуметтік желілердегі пабликтерге орналастырылды.

«Такси жүргізушісі қоңырау шалып, баланы көргенін айтты. Ол дін аман. Бала ата-анасына тапсырылды», - деп мәлім етті баспасөз қызметінен.

Полицейлер іздестіру жұмыстарына қатысқандардың баршасына алғыс білдірді.