Петропавлда аялдамадағы адамдарды соққан жеңіл көлік жүргізушісі рульге ие бола алмай қалған - полиция

None
Фото: polisia.kz
ПЕТРОПАВЛ. ҚазАқпарат – Петропавлда автобус аялдамасына соғылған жеңіл көлік жүргізушісі рульге ие бола алмай қалған. Қоғамдық көлікке де зақым келді, деп хабарлайды ҚазАқпарат тілшісі.

Бұған дейін Петропавлда жеңіл көліктің адамдар тұрған аялдаманы соғып, бес адамның зардап шеккенін айтқан едік. Осы оқиғаға қатысты қалалық полиция басқармасы түсінік берді.

«26 мамыр сағат 13.30 минут шамасында Петропавлдың 45 жастағы тұрғыны Жамбыл көшесінде «Honda Fit» маркалы көлік құралын басқарып келе жатып жолаушылар тасымалдайтын «Lifan» маршруттық автобусымен соқтығысқан.

Жол-көлік оқиғасы нәтижесінде «Honda Fit» автокөлігінің жүргізушісі көлік тізгініне ие бола алмай, ішінде автобусты күткен адамдар тұрған Жамбыл көшесіндегі аялдама павильонына барып соғылған.

Жедел жәрдем бригадаларының қызметкерлері түрлі медициналық мекемелерге зардап шеккен үш адамды жеткізді.

Тексеру нәтижелері бойынша зардап шеккен әйелдердің бірі облыстық ауруханаға жатқызылды.

Жүргізушілерге медициналық тексеру жүргізілді, алдын-ала мәліметтер бойынша, екі жүргізуші де мас емес», - делінген хабарламада.

Полицейлердің айтуынша, көлік құралдары арнайы айып тұрағына қойылды.

Аталған факті ҚР Қылмыстық кодексінің 345-бабының 2-бөлігі бойынша Сотқа дейінгі тергеп-тексерулердің бірыңғай тізілімінде тіркелді. Сараптамалар тағайындалды, анықтау жүргізіліп жатыр.

Айта кетейік, бұған дейін жеңіл көліктің адамдар тұрған аялдамаға соғылғанын хабарлаған едік.
Соңғы жаңалықтар