Петропавлда анықталған қаңғыбастардың басым дені 30-44 жаста
Солтүстік Қазақстан облыстық Полиция департаменті баспасөз қызметінің мәліметінше, Петропавл қаласы полиция басқармасының қабылдау-тарату орнының жинау тобы қызметкерлері қаңғыбастарды анықтау үшін күнде рейдке шығады. Мобильді топ күндізгі сағат 15.00-ден 23.00-ге дейін жұмыс істейді. Полицейлер кезбелер жиі шоғарланатын жылу трассаларын, кәріз құдықтарын, қоқыс тастайтын жерлерді, шағын базарларды, вокзалдарды тексереді.
«Түнде ауа температурасы – 10 градусқа дейін жетеді. Үйсіз-күйсіз жүргендер үсікке шалынбас үшін және жазатайым оқиғаларға жол бермеу мақсатында әр жерден жиналған қаңғыбастарды Жұмысшы кентінің шетінде орналасқан түнгі түнеу бөлімшесіне түнеуге жеткіземіз. Бірақ ең алдымен олар із-түзсіз жоғалғандар базасы, қылмыс жасағаны үшін іздестірудегі және басқа да есептер бойынша тексеріледі. Жыл басынан бері іздеуде жүрген 5 адамды анықтадық, олардың біреуі қылмыскер, төртеуі түрлі құқық бұзушылықтарды жасауда күдіктілер», - дейді Петропавл қаласы полиция басқармасы қабылдау-тарату орнының бастығы Адай Смаилов.
Жыл басынан бері қалалық полицейлер тұрғылықты мекенжайы жоқ 192 адамды, оның ішінде 139 ер адам мен 53 әйелді есепке қойды. Анықталған қаңғыбастардың басым бөлігі – 30 бен 44 жас аралығындағылар, осындай барлығы 81 адам ұсталды. 18 бен 29 жас аралығындағы – 39, жасы 45-тен асқан 21 адам анықталған.
Адай Смаиловтың айтуынша, жалпы жыл басынан бері қабылдау орнына 1609 адам жеткізілген. Оның 192-сі соттың санкциясымен орналастырылғандар. Егер тұрғындар тұрғылықты мекенжайы жоқ адамдардың жиналғанын көрсе, онда 8 (7152) 52-92-99 телефоны бойынша қабылдау-тарату орнының кезекші бөліміне немесе тәулік бойы жұмыс істейтін 102 нөміріне хабарласа алады.