Петропавлда 60 шақты соғыс ардагері мереке қарсаңында сыйақы алды
Петропавлға Қазақстандағы Ресей Федерациясы елшілігінің және ҚР Ауған және жергілікті соғыс ардагерлері одағының өкілдері келіп, қарттарды қолдау айлығы аясында ардагерлерді құттықтады. Сондай-ақ 60-тан астам адамға 100 мың теңгенің сертификатын сыйлады.
Марапатқа ие болғандардың бірі – петропавлдық Александр Куркин. Ол 1979 жылы әскер қатарына алынып, Ауғанстанға соғысқа жіберіледі. Ардагердің айтуынша, Кабулда 345 полк құрамында соғысып, жарты жылдан кейін жарақат алуына байланысты елге қайтарылған. Кейін денсаулығы сыр бергенше дейін көлік жүргізушісі болған. Жалпы бұл күні Александр сияқты тағы ауған соғысының 30 ардагері, Екінші Дүниежүзілік соғысының көзі тірі 23 ардагері және тәжік-ауған шекарасындағы соғысқа қатысқан 10 адам сыйақы алды.
«Нұр-Сұлтан қаласынан арнайы келіп өңірден соғысқа аттанған, жауынгерлік әрекеттерге қатысқан ардагерлерді құттықтап жатыр. Ауған соғысының 30 ардагерін тізімнен таңдап алдық, олар көмекке мұқтаж жандар. Сондай-ақ Ұлы Отан соғысының ардагерлері де ұмыт қалған жоқ», - дейді облыстық ардагерлер кеңесінің төрағасы Ескендір Елеусізов.
Өңірдегі Екінші Дүниежүзілік соғыс ардагерлерінің онға жуығы – ғасыр құрдастары. Арасында өздігінен жүре алмайтындары да бар. Оларға сыйақыны делегация мүшелері үйлеріне апарып берді.
Бұған дейін СҚО-да 104 мыңнан астам зейнеткердің бар екенін, Қарттар күніне орай жалғызілікті қарияларға отын-көмір, азық-түлік, дәрі-дәрмек жеткізілетінін айтқан едік.
