Петропавл: Жаңа құрылған «Жас өркен» ықшамауданында 250 орындық емхана салынады
СҚО әкімдігінің отырысы өтіп, өткен жыл қорытындыланды.
Өңірдің денсаулық сақтау саласына былтыр бөлінген 12,5 млрд теңге 2019 жылмен салыстырғанда 4 есе көп. Бұл ақшаға облыстық ауруханада 11 жыл жұмыс істеген МРТ аппараты ауыстырылды, нәтижесінде кезек 4 есе қысқарып, енді сырқаттар 3 ай емес 3 апта күтетін болған. Ал мидағы ісікті анықтау 4%-ке артқан.
Бұдан басқа 2008 жылы алынған ескі ангиограф ауыстырылды. Бұл жүрек-қан тамырлары аурулары диагностикасын жақсартты.
«Жақын күндері облыстық ауруханада 3 деңгейлі инсульт орталығын ашамыз. Осыған байланысты тағы бір ангиограф аламыз. Ол бас миы тамырларына ота жасауға осылайша мидағы қан айналымы бұзылған алғашқы сағаттарда болатын өлім-жітімді азайтуға мүмкіндік береді», - деді Құмар Ақсақалов.
Компьютерлік томографтардың саны 4-ден 6-ға дейін артты. Бұл ұзын-сонар кезекті азайтып, тыныс алу мүшелерінің ауруларын дер кезінде анықтауға әсер етті.
Онкологиялық диспансерге, Ақжар, Жамбыл, Тимирязев және Уәлиханов аудандарының орталық ауруханаларына цифрлық маммографтар алынды.
Былтыр сондай-ақ бірер айдың ішінде 7 млрд теңгеге 200 орындық инфекциялық аурухана бой көтерді. 38 жедел жәрдем көлігі алынып, облыс онымен 100 % қамтылды. Сондай-ақ заманауи көшпелі 8 медициналық кешен сатып алынды.
Денсаулық сақтау саласына қаржының мол бөлінуі кей көрсеткіштер бойынша оң динамика берді. Соның ішінде онкология бойынша өлім-жітім 13 %-ке, жүрек талмасы бойынша 10 %-ке, туберкулез бойынша 36 %-ке азайды.
Биыл «Береке» ауданындағы 250 орындық емхананың құрылысы жалғасады. Дәл осындай емхана жаңа ықшам аудан – «Жас өркенде» де пайда болмақ.