Петропавл полицейлері КВИ-дан қайтыс болғандар туралы мәліметті ритуалдық агенттіктерге сатқан

ПЕТРОПАВЛ. ҚазАқпарат – Петропавлда полиция қызметкерлері ритуалдық агенттіктерге коронавирустан қайтыс болғандар туралы мәліметті сатты деген күдікке ілінді, деп хабарлайды ҚазАқпарат тілшісі.

СҚО сыбайлас жемқорлыққа қарсы қызметтің мәліметінше, Петропавл қаласы полиция басқармасының жедел басқару орталығының бірнеше қызметкері күдікке ілінді.

Олар облыс орталығындағы ритуалдық агенттіктерге қала аумағында қайтыс болған адамдар туралы мәліметтерді сатып келген.

Полицейлер қайтыс болған адамның сауалнамалық деректерін беріп, бұл қызметті 4 мың теңгеге бағалапты.

Қазір сотқа дейінгі тергеу жүріп жатыр. Мамандардың айтуынша, бұл істің қалған мән-жайы тергеу мүддесіне сай жария етуге жатпайды.

Іс бойынша түпкілікті шешім тергеу жүргізу нәтижесі бойынша қабылданбақ.