Пеле ФИФА-ның арнаулы кубогімен марапатталды

АСТАНА. ҚазАқпарат – Халықаралық футбол федерациясының арнаулы кубогін аты аңызға айналған футболшының жұбайы Марсия Аокиге Роналдо табыстады, деп хабарлайды ҚазАқпарат FIFA сайтына сілтеме жасап.

Парижде өткен The Best FIFA Football Awards™ 2022 салтанатты шарасын ашып берген ФИФА президенті Джанни Инфантино өз сөзінде Пелені еске алды.

«Король – О Рей – Пеле. Пеле туралы не айта аламыз? Пеле – футбол. Ол енді ортамызда жоқ. Қатты сағынамыз. Алайда, Пеле мәңгілік бізбен бірге болады. Бүгінгі салтанатты шараға бізбен бірге қатысқаны үшін Пеленің отбасына алғыс айтамын. Көп рахмет!» - деді ол.

ФИФА-ның арнаулы марапатын Пеленің жұбайы Марсия Аокиге Бразилияның супержұлдызы, халықаралық федерация мақтанышы Роналду табыстады.

Марсия Аоки футболдың әлемдегі барша фанатына, ойыншылар мен ұйымдастырушыларға алғыс білдірді.

Еске салсақ, Бразилиялық атақты футболшы Пеле 82 жасында өмірден өтті.

Бразилияда футбол королі Пеленің қайтыс болуына байланысты үш күндік аза тұту жарияланды.

Әлемдегі бұқаралық ақпарат құралдары Пеленің өмірден өткенін хабарлап, оның футбол тарихындағы орнын, қандай адам болғанын жаппай жазды.