Павлодарлық студенттер 30 қарияға азық-түлік таратты

ПАВЛОДАР. ҚазАқпарат - Мереке күндері университет жатақханасында қалған Павлодар педагогикалық университетінің студенттері қайырымдылық акциясына бастамашы болды, деп хабарлайды ҚазАқпарат.

Ел Тәуелсіздігінің 30 жылдығына орай студенттер 30 қарияға әлеуметтік маңызы бар азық-түлік салынған жәшіктер таратты.

Еріктілер арнайы ұйымдастырылған қайырымдылық жәрмеңкеден жиналған қаражатқа азық-түлік сатып алды.

Сатылымға қойылған қолөнер бұйымдарынан студенттер 200 000 теңгеге жуық табыс тапты.

Содан екі күннің ішінде қарттарға азық-түлік пакеттерін жеткізіп берді.

Ата-әжелер оқу орнының белсенді жастарына алғысын айтып, болашақ ұстаздардың игі істеріне сәттілік тіледі.

Естеріңізге сала кетейік, «LOTOS» еріктілер ұйымы Павлодар педагогикалық университетінде игі істерді жүзеге асыру үшін құрылған.