Павлодар облысының трассасында 6 адам зардап шекті
Оқиға Екібастұз қаласы мен Майқайың кенті арасындағы трассада болған. Жол апаты орнында түсірілген видео әлеуметтік желіде тарады.
Облыстық Денсаулық сақтау басқармасының мәліметіне сәйкес, екі көліктің соқтығысуынан 6 адам зардап шекті. Олардың үшеуі жедел жәрдем қызметі келгенге дейін оқиға орнынан кетіп қалған. Қалған үшеуіне медициналық көмек қажет болған.
«25 жастағы ер адамда – омыртқаның компрессиялық сынуы, сол жақ кеуде тұсының соғылуы, құрсақ бөлігінің сыздап ауыруы, 32 жастағы әйелде – оң және сол жақ санының жабық сынуы, қабақ үстіндегі терінің және иектің жыртылған жарақаты, 26 жастағы ер адамда жамбас сүйегінің сынуы диагноздары қойылды», - деді Денсаулық сақтау басқармасынан.
Зардап шеккендердің барлығы Екібастұз қалалық ауруханасына жеткізілді. 32 жастағы әйел ауыр жағдайда жансақтау бөлімінде жатыр.