Павлодар облысының ауылдарында әкімдер сайлауы өтеді

ПАВЛОДАР. ҚазАқпарат – 28 тамызда Павлодар облысында ауылдық округ әкімдерінің сайлауы өтеді, деп хабарлайды ҚазАқпарат тілшісі Pavlodarnews.kz сайтына сілтеме жасап.

Сайлау арқылы Ақсуға қарасты Қызылжар ауылдық округінің әкімі таңдалады. Сайлау комиссиясының ақпараты бойынша, округ құрамына бес елді мекен кіреді. Ондағы халық саны — 3623 адам. Соның 1699-ы сайлауға қатысады деп күтілуде. Тұрғындар Қызылжар және Сарышығанақ ауылдарында орналасқан № 495 және №500 учаскелерінде дауыс береді.

Сайлауға AMANAT партиясының атынан қалалық төтенше жағдайлар басқармасының азаматтық қорғаныс бөлімінің басшысы Әбілдинов Дәулет Жұмабайұлы қатысып отыр.

Тағы екі үміткер өзін-өзі ұсынған. Оның бірі – Ақсу қаласының тұрғын үй-коммуналдық шаруашылығы басқармасы бөлімінің басшысы Байманов Қанатбек Қайроллаұлы. Ал өзін-өзі ұсынған екінші кандидат — қалалық Халықты жұмыспен қамту орталығы бөлім басшысының орынбасары Ермекова Әсемгүл Қанатқызы.

Сонымен қатар, Ефремов ауылдық округінде әкім сайлауы өтеді. Сайлаушылар Ефремов мектебінің ғимаратында орналасқан учаскеде дауыс бере алады. Дегенмен мұнда әзірге үміткерлер тіркелген жоқ. Сол сияқты Баянауыл және Күркелі ауылдарында да әкім сайлауы өтеді.

Еске сала кетсек, бұған дейін Мемлекеттік кеңесші Ерлан Қарин былтырдан бері 1093 елді мекеннің әкімі сайланғанын мәлімдеген еді.

Фото: pavlodarnews.kz