Павлодар облысында жол апатынан екі адам мерт болды

ПАВЛОДАР. ҚазАқпарат - Павлодар - Астана тас жолында екі көлік соқтығысып, екі адам қаза тапты, бесеуі (ішінде екі бала бар) ауруханаға жеткізілді, деп хабарлайды ҚазАқпарат тілшісі.

«2016 жылы туған сәби жабық бас сүйек-ми жарақатын алды. Оған дәрігерлер орташа ауыр деңгейдегі ми жарақаты диагнозын қойып отыр. 2018 жылы туған екінші бала дәл осылай жабық бас сүйек-ми жарақатын алған, сондай-ақ, орташа деңгейдегі ми жарақаты мен еңбек сүйегі сынған деп диагноз қойылып отыр. Екеуі де облыстық балалар ауруханасына жеткізілді», - деді Павлодар облысы Денсаулық сақтау басқармасы баспасөз қызметінің өкілі.

Белгілі болғандай, жаңадан салынып жатқан Павлодар-Астана тас жолының 45- шақырымында, Ақсу қаласының Спутник пен Қалқаман ауылдарының арасында екі жеңіл автокөлік бетпе-бет соқтығысқан. Оқиға орнына жақын маңдағы трассалық медициналық-құтқару пунктінің жасағы барды.

Оқиғаның себептері мен мән-жайы анықталып жатыр.