02:33, 12 Қараша 2020 | GMT +6
Павлодар облысында шектеуге қарамастан 7 той өткізілген
ПАВЛОДАР. ҚазАқпарат - Карантин шектеуі күшейтілгеніне қарамастан, өңірде отбасылық іс-шараларды өткізу тоқталмай тұр. Мейрамхана иелерінің арасында жүйелі түрде санитарлық-эпидемиологиялық талаптарды бұзатындары да бар, деп хабарлайды ҚазАқпарат Павлодар облысының санитария-эпидемиология бақылау департаментіне сілтеме жасап.
Павлодар облысында эпидемиологиялық ахуалдың нашарлауына байланысты мониторинг тобының жұмысы күшейтілді. Тек соңғы аптада облыста көлемінде 7 рет той өткізу фактісі тіркелді, олардың көпшілігі демалыс күндері болған.
Мәселен, 6 қарашада Екібастұз қаласында «Бәйтерек» мейрамханасында 60 адамға арналған үйлену тойы өткен. 7 қарашада облыс орталығындағы «Саида Плаза» мейрамханасындағы тойға одан да көп қонақ жиналған.
8 қараша күні «Алтын ғасыр» мейрамханасында қонақтар құдалықты атап өткен. «Барыс» мейрамханасында бір уақытта қыз ұзату мен мерейтойатап өтілген.
Барлық факті бойынша жауапты тұлғаларға мониторинг тобының өкілдері тарапынан әкімшілік хаттама толтырды.