Павлодар облысында көпір өткеліндегі жол апатынан 4 адам зардап шекті
Оқиға 28 шілде күні Ақсу қаласына баратын бағыттағы көпір өткелінде болған.
Облыстық жедел жәрдем станциясының мәліметінше, жол апаты туралы хабарлама сағат 22.38-де түскен. Автокөліктердің соқтығысуы салдарынан 4 адам зардап шеккен. «43 жастағы әйел мен 67 жастағы ер адам түрлі жарақаттармен және сынықтармен № 1 Павлодар қалалық ауруханасына жеткізілді. 32 жастағы әйел мен 71 жастағы ер адам ауруханаға жатудан бас тартты», - деді станцияда.
Облыстық Денсаулық сақтау басқармасының ақпаратына сәйкес, 43 жастағы әйелде жабық бассүйек-ми жарақаты, іш қуысының жарақаты, сынықтар, үшінші дәрежедегі травматикалық шок тіркелді. Жағдайы ауыр деп бағалануда, жансақтау бөлімінде өкпені жасанды желдету аппаратына қосылған.
67 жастағы ер адамда да жабық бассүйек-ми жарақаты, миының шайқалуы мен түрлі жарақаттар анықталды. Нейрохирургия бөліміне орналастырылған. Жағдайы орташа ауыр.
Фото: Константин Шелков